Instagrambilete:

Tre millionar endra bygd på Sunnmøre

Det var etter eit besøk av den amerikanske fotografen Michaela Potterbaum i 2014 at internasjonale magasin og presse fekk auga opp for Trandal ved Hjørundfjorden på Sunnmøre.

SJÅ VIDEO:

Etter at Potterbaum publiserte eit bilete av ei jente på ei huske, med fjord og fjell i bakgrunnen, fekk Trandal stor merksemd (sjå bilete lenger ned i saka). Dette har og påverka besøkstalet i bygda.

Lenita Storeide, som er arrangør av Trandalblues, fortel at under festivalen blir talet på bebuarar i Trandal berre ein brøkdel av alle festivaldeltakarane. I løpet av blueshelgen er det venta ca 1.500 besøkande på Trandalblues, som går av stabelen fredag 5. og laurdag 6. juli 2019.

Det populære biletet av jenta på huska har fått mange til å ville oppsøke Trandal. Internasjonal presse viser ofte si interesse ved å kontakte Storeide for meir informasjon. Lenita fortel at ho har fått telefonar frå reiselivsmagasin i Australia, England og USA som gjerne vil lage reportasjar om huska. - Det var og eit australsk magasin som hadde laga ei liste over "topp ti husker i verda du må oppsøke", der huska vår var ei av dei ti.

I 2017 var Blues Brothers Band det store trekkplasteret til Trandalblues. At Trandal er heilt i toppen på lista over fantastiske stader dei har opplevd, og at det er god stemning ved fjorden med fjella som sceneteppe, er berre nokre av lovorda frå det kjende bluesbandet. At plassen er liten, meinar ein av musikarane i Blues Brothers gjer det heile meir intimt, og at det blir lettare å sjå ansikta til dei som er på konsert.

At leiketyet Storeide hadde i barndomen skulle bli ein farsott på internett, var ikkje planlagt då huska vart hengt opp.

- Det starta faktisk med at bestefaren min skulle ha ei huske til ungane. Han festa opp huska, og den var ikkje noko meir enn eit leikety inntil før for 1 1/2 år sidan. Då blei eg oppringt av Michaela som ba meg om å gå inn på nettet for å sjekke. Bilete var då delt meir enn tre millionar gonger på ulike plattformer. Etterkvart kom det fleire hit, som sa dei hadde sett biletet. Mange har ringt meg og spurt om det er eg som eig huska. Då svarer eg ja. Oppfølgingsspørsmålet blir då oftast korleis dei kan kome seg hit. Nokre av dei besøkande frå blant anna USA, har hatt to agendaer i Noreg. Det eine er Atlanterhavsvegen og det andre er huska vår, fortel Storeide.

Den store merksemda har og påverka overnattingskapasiteten på Trandal. Lenita fortel at det i dag er plass til 33 overnattingsgjestar, men at det og er mogleg å telte for dei som ynskjer det. Ho fortel vidare at dei har hytter og hus til leige, men at det ikkje er så mange enda. - Det blir litt deling av rom, samt doble og triple rom. Her er det rom for å bli gode venner, humrar ho.

For Lenita er Trandal både festivalarena og barndomens paradis. - Det aller beste med Trandal er at plassen er veglaus, og at ein har fridom til å springe berrføtt og gjere det ein vil; kjenne på fridomen, rett og slett. Dette var i alle fall heilt genialt for oss ungar. Vi kunne dra ut på sjøen og bade, og hadde få reglar så lenge vi var ute. I tillegg hadde vi jo huska. Så det var heilt topp, avsluttar Storeide.

Den enklaste måten å kome seg til Trandal på er å ta ferja frå enten Sæbø, Standal eller Leknes. Reiser ein frå Ålesund tek turen ca. 1 time og inkluderer to ferjer, Solevåg - Festøy og Standal - Trandal. Ein kan og ta hurtigbåt fra Ålesund, turen går frå hurtigbåtkaia ved rutebilstasjonen og har tre daglege avgangar.

Hjørundfjorden rundt har blitt ein populær dei seinare åra. Vandringa rundt Hjørundfjorden over fjelltoppane tar rundt seks dagar, og er best å gå med guide.

Etter å ha vore på toppen av Slogen kan ein klyve ned og gå til Trandal: Plassen med rykte for god stemning og musikkfestivalar. Om ein vil overnatte i Trandal før den tøffe sisteetappen frå Trandal til Hundeidvik, er dette og mogleg.

> Bestill billetter til hurtigbåten fra Ålesund til Hjørundfjorden her