Ljøbrekka — Den Trondhjemske postveg

Vandretur over Ljøbrekka langs delar av "Den Trondhjemske Postveg". Om du kjem frå Hellesylt køyrer du gjennom den første tunnellen i retning mot Stranda og finn parkering ved utsiktspunktet. Turvegen tek av frå hovudvegen på motsattt side og snor seg i 35 hårnålssvinger opp til Ljøsetra. Her flater terrenget noko ut, og du passerer Nykkjevatnet på nordvestsida ca 740 m.o.h. før du når rutas høgste punkt 780 m.o.h. ved Kremmarvatnet. Snart går stien i 21 hårnålsvingar ned Herdalsbrekka og på austsida av vatnet inst i Herdalsbotnet. Fin turveg i slakt terreng tek deg til hyttene og parkeringsplass ved hovudvegen i Herdalen (Strandadalen)

Historie:

Denne ruta var ein liten del av den 800 km lange postruta mellom Bergen og Trondheim, men vart sett på som ein av dei mest krevande delane. Postberarar var ein mann frå Herdalen og ein frå Ljøen. Gjennom vinteren hende det seg at dei måtte hale seg opp og ned Herdalsbrekka ved hjelp av eit 245 meter langt tau. I 1862-63 vart ein hesteveg anlagt i Herdalsbrekka og ein kunne køyre med hesteslede. Fire år seinare vart postruta over Ljøbrekka lagt ned og dampskipa tok over posttransporten mellom Bergen og Trondheim.